رواية اميرة اخر الزمان الفصل الثانى والعشرون 22 والثالث والعشرون 23
#الحلقة_22
#رواية_أميرة_أخر_الزمان
#بقلمي_ملك_إبراهيم
ـ انا هروح لاخوكي القسم وانتي حاولي تتصلي بـ ختك وجوزها لحد ما يردوا عليكي وخلي بالك من بنات اخوكي علي ما اجي عشان العقربه اللي فوق دي طلعت وقفلت علي نفسها، اللهي الشقه تولع بيها فوق ونخلص منها
حركت شاهندا رأسها بالايجاب وذهبت والدتها من المنزل وجلست شاهندا تحاول الاتصال بشقيقتها.
__________
في منزل والدة أميرة..
جلس ضياء مع والدته واخبرها بما فعله وبمساعدت الدكتور محمد لاميرة واخبرها ايضا ان أميرة اتهمت جمال بالاعتداء عليها..
شهقت والدته بصدمة قائلة لابنها بلوم.
ـ ليه كده يا ضياء احنا مش ناقصين مشاكل يا بني، جمال كده مش هيسيبها في حالها
تحدث ضياء الي والدته بغضب قائلاً لها.
ـ يعني كنتي عايزانا نسكت بعد اللي هو عمله في أميرة ده؟!
خفضت والدته رأسها بحزن قائلة له.
ـ اختك مش ناقصه مشاكل يا ضياء هي فيها اللي مكفيها يابني
تحدث ضياء بغضب وعصبيه قائلاً لوالدته.
ـ يا امي بطلي كلامك ده وبعدين هي كانت أميرة اختي اللي عملت مشاكل ولا هو اللي جه هنا وضربها وبهدلها وابويا بدل ما يقفله ويجيب لأميره حقها صدقه وطردها
بكت والدته وتحدثت بقلق قائلة له.
ـ طب واختك عامله ايه دلوقتي
تحدث ضياء بحزن قائلاً لوالدته.
ـ تعبانه اوي بس راندا وامها معاها وهياخدوا بالهم منها
ثم اضاف.
ـ بصراحه راندا صحبتها دي جدعه اوي يا امي، اول ما كلمتها وقولتلها على اللي حصل لـ أميرة جرت على المستشفي معانا ومسبتش أميرة لحظة واحده وكمان خدتها معها علي بيتهم
بكت والدته بعجز قائلة له.
ـ ربنا يجزيها خير يا رب ويكرمها زي ما كرمت بنتي وينتقم من كل ظالم جه على بنتي وكسر بخاطرها
تحدث ضياء بهدوء.
ـ والدكتور محمد كمان يا امي بصراحه راجل جدع اوي وواقف مع أميرة كأنه اخوها واكتر
تحدثت والدته وهي تبكي.
ـ ربنا يوقفلها ولاد الحلال يارب في كل طريق
__________
في منزل راندا..
جلست راندا بجوار أميرة على الفراش وتحدثت اليها بابتسامة قائلة لها بحماس.
ـ اهو انا اموت واشوف الزفت اللي اسمه جمال ده وهو متعلق في القسم من قفاه
ضحكت أميرة بتوتر قائلة لها بخوف.
ـ بس انا خايفه اوي يا راندا لا يعمل حاجه في البنات بعد ما يخرج عشان ينتقم مني فيهم
تحدثت اليها راندا بثقة قائلة لها.
ـ يخرج مين دا هيتعلق في القسم وبعدين متنسيش ان الدكتور محمد هيجبلك محامي كبير يعني هيجبلك حقك من عينيه
شردت أميرة في الدكتور محمد و في مساندته لها حتى الان، ابتسمت وتحدثت الي راندا قائلة لها.
ـ بصراحه الدكتور محمد ده محترم اووي وابن حلال
ابتسمت راندا وتحدثت اليها بمرح قائلة لها.
ـ عايزين نعرف هو متجوز ولا مرتبط ولا حكايته ايه
نظرت اليها أميرة بستغراب قائلة لها.
ـ واحنا هنعرف ليه يعني ربنا يصلح حاله وخلاص
تحدثت راندا بابتسامة قائلة لها.
ـ بصراحه لو متجوز او مرتبط يبقى يبختها لانه من نوع الرجاله اللي مبقاش موجود منهم دلوقتي، جدع و محترم وابن ناس
تحدثت أميرة بهدوء قائلة لها.
ـ والست والدته كمان ست محترمه وقلبها كبير ربنا يجازيها خير يا رب
تحدثت راندا الي أميرة بمرح قائلة لها.
ـ اهو شوفي الفرق بينهم وبين اللي احنا كنا متجوزين عندهم
تحدثت أميرة بحزن قائلة لها.
ـ الحمدلله على كل حال وبعدين كل شئ قسمة ونصيب
حركت راندا رأسها قائلة لها.
ـ بس احنا برضه كان اختيارنا غلط يا أميرة
تحدثت أميرة بتأكيد قائلة لها.
ـ عندك حق، يعني جمال ده لما اتقدملي كان الكل شايفين اني مش هعرف اعيش معاهم وكانوا بيقولوا عليه ابن امه وكانوا بيقولوا كمان ان امه مش سهله بس انا وقتها كنت عيله صغيره وعايزه اتجوز واهرب من بيت جوز امي ده
حركت راندا رأسها بالايجاب قائلة لها.
ـ وانا برضه نشفت دماغي وصممت اتجوز طليقي ده وكنت بقول ان كل عيوبه دي هتروح بعد الجواز بس روحي انا اللي راحت معاه هو وامه
ضحكت أميرة وتحدثت بمرح.
ـ حطي خيبتك علي خيبتي وخلينا ننام احسن
ضحكت راندا هي الاخري وتمددت فوق الفراش بجانب أميرة وشردت في الدكتور محمد، ترا به كل ما تتمناه اي أمرأة وتمنت ان يرزقها الله برجل مثله. رواية أميرة أخر الزمان بقلمي ملك إبراهيم
في شقة والدة الدكتور محمد..
جلس مع والدته واخبرها ما حدث مع أميرة، حزنت والدته من اجل أميرة لكنها تحدثت اليه بلوم قائلة له.
ـ بس مكنش ينفع تدخل نفسك في مشاكلها دي يا محمد، احنا اه هنساعدها انها تعمل العملية لبنتها لكن مشاكلها هي وطليقها دي حاجات خاصة بيهم ومينفعش انت تدخل لان تدخلك هيتفهم غلط
نظر الدكتور محمد الي والدته بدهشة قائلاً لها.
ـ يعني ايه تدخلي هيتفهم غلط، هو انا عملت ايه غلط اصلا عشان يتفهم غلط، انا كل اللي انا عملته اني خدتها المستشفى وعملتلها التقرير الطبي وبلغنا الشرطه وهي اتهمت طليقها وبعد ما الشرطة مشيو انا وصلتها هي واخوها وصحبتها لحد بيتهم
تحدثت اليه والدته بصدمة قائلة له.
ـ وكمان وصلتهم لحد البيت!!
نظر الدكتور محمد إلى والدته وتحدث اليها قائلاً.
ـ في ايه يا امي، حضرتك خايفه من ايه بالظبط؟!!
نظرت اليه والدته بتوتر ثم تحدثت اليه بهدوء قائلة له.
ـ انا خايفه عليك يا محمد، انت دكتور وليك اسمك ومينفعش اسمك يتذكر في مشاكل بين واحده وطليقها وكمان احنا منعرفش أميرة دي ومنعرفش اي حاجه عن حياتها
زفر الدكتور محمد بغضب قائلاً لوالدته.
ـ يا امي لو سمحتي بلاش تحسسيني اني لسه طفل صغير، انا بقيت كبير كفايه اني اقدر اعرف الناس وافرق بين الكويس والوحش
نظرت اليه والدته بتفهم ثم تحدثت اليه بهدوء قائلة له.
ـ تمام يا محمد، اظن انت خلاص كده دورك في مساعدتها انتهى؟
تحدث الدكتور محمد بهدوء.
ـ لسه يا امي، أميرة بنت يتيمه واتظلمت في حياتها ومحتاجه اللي يكون جمبها ويساعدها لحد ما تقف على رجليها
نظرت اليه والدته بصدمة ثم تحدثت اليه قائلة.
ـ ومين دا اللي هيقف جمبها؟!!
وقف الدكتور محمد وتحدث الي والدته بهدوء قائلاً لها .
ـ انا هعمل اللي عليا معاها يا امي
ثم اتجه الي غرفته وترك والدته تجلس تنظر أمامها بقلق، تخشى ان يتعرض ابنها لأى اذى بسبب أميرة ومشاكلها.
_____________
بداخل قسم الشرطة..
وقفت والدة جمال تترجى احد رجال الشرطة ان يطمنها على ابنها ويخبرها ماذا حدث معه، تحدثت اليه برجاء قائلة له.
ـ والنبي ياباشا جم خدوا ابني من البيت ومش عارفه هو فين وايه اللي حصل
تحدث اليها امين الشرطة بطريقة فظة قائلاً لها.
ـ اسمه ايه ابنك يا حاجه احنا مش ناقصين وجع دماغ على المسا
تحدثت اليه بقلق.
ـ اسمه جمال
قاطعه امين الشرطة قائلاً لها.
ـ اااه هو ده اللي ضرب طليقتها وكسر ضلوعها؟
نظرت اليه والدة جمال بصدمة بعد ما اخبرها انه كسر ضلوع أميرة، تحدثت اليه بلهفة قائلة له.
ـ ايوه هو
ابتسم امين الشرطة بسخرية قائلاً لها.
ـ لا متقلقيش عليه هو في الحبس دلوقتي لحد ما حضرة الظابط يجي بكره الصبح، اصل ابنك ده متوصي عليه جامد
نظرت اليه بقلق قائلة له.
ـ يعني ايه متوصي عليه؟!!
تحدث امين الشرطة بصرامه قائلاً لها.
ـ يعني متوصي عليه يا حاجه افهميها انتي بقى، يعني حد مهم تبع طليقته موصي عليه
وقفت والدة جمال تنظر امامها بدهشة قائلة.
ـ حد مهم تبع أميرة ازااي؟!
ثم تحدثت الي امين الشرطة مرة اخري برجاء وهي تضع 200 جنيه بيده قائلة له.
ـ طب معلش يا باشا انا عايزه اشوفه دلوقتي
اخذ منها امين الشرطة الـ 200 جنيه ووضعهم بجيب بنطلونه سريعا وهو ينظر حوله كي يتأكد ان لا احد يراه ثم تحدث اليها بتأكيد قائلاً لها.
ـ مش هينفع تشوفيه دلوقتي، بس المهم دلوقتي ان انتي تروحي لـ طالقته وتترجيها عشان تتنازل عن المحضر لانها لو متنزلتش ابنك هيتسجن
رواية أميرة أخر الزمان بقلمي ملك إبراهيم
نظرت اليه والدة جمال وتحدثت بصدمة قائلة له.
ـ يعني لو طليقته متنزلتش ابني هيتسجن بجد؟!
رد امين الشرطة بتأكيد قائلاً لها.
ـ ايوه طبعاً يا حاجه بجد دي جنايه
شقهت بصدمة قائلة له.
ـ طب معلش يا بني خليني اطمن عليه واشوفه لو محتاج حاجه اجبهاله لحد الصبح وربنا يسهل اروح لطليقته وتيجي تتنازل
تحدث اليها امين الشرطة بتحذير وهو ينظر حوله قائلاً لها.
ـ يا حاجه مش هينفع بقولك ابنك متوصي عليه جامد والاحسن تروحي دلوقتي تحلي الموضوع مع طليقته عشان تيجي تتنازل بكره واتفضلي بقى امشي دلوقتي مش عايزين وش
نظرت والدة جمال حولها بتعب هامسة بغضب من ابنها.
ـ ليه كده بس يا جمال تبهدل نفسك وتبهدلني معاك
ثم ذهبت من القسم كي تذهب الي منزل والدة أميرة وتتحدث اليهم وتطلب من أميرة ان تأتي معها في الصباح وتتنازل عن المحضر.
___________
الساعه الواحدة بعد منتصف الليل في منزل اماني وفتحي..
عاد فتحي الي المنزل واغلق الباب بعنف.
اتجه الي غرفة النوم وجد زوجته نائمة فوق الفراش وتغطي وجهها كاملا بالغطاء، زفر بغضب واقترب من الفراش ونزع حذائه وتمدد فوق الفراش بجوارها بملابسه كما هو..
كتمت اماني شهقاتها من شدة البكاء كي لا يعلم انها تبكي منذ ذهابه حتى عودته.
__________
في منزل والدة أميرة..
كان الدسوقي زوج والدة أميرة يجلس في منتصف الشقه يشاهد التلفاز وزوجته واولاده نائمين بالداخل..
استمع الي صوت طرق خفيف علي باب الشقه..
ذهب ليفتح الباب تفاجئ بوالدة جمال تقف امامه وتحدثت اليه بتوتر قائلة له.
ـ معلش يا ابو ضياء ان انا جيت في وقت متأخر زي ده بس معلش كنت عايزه اتكلم مع أميرة كلمتين
نظر اليها الدسوقي بتفكير ثم تحدث اليها بمكر قائلاً لها.
ـ يعني ينفع اللي ابنك جه عمله فينا ده وفضحنا قدام الناس ومسك البت ضربها قدامي وشتمني ومعملش حساب لحد
خفضت والدة جمال وجهها قائلة له.
ـ معلش يا ابو ضياء حقكم عليا وانا جايه دلوقتي اطيب خاطركم واللي انتوا عايزينه كله من عينينا
سمح لها الدسوقي بالدخول قائلاً لها.
ـ طب اتفضلي نتكلم جوه مش هينفع نتكلم علي الباب كده كفايه فضايح
نظرت والدة جمال حولها بتوتر ثم تحدثت بهدوء قائلة له.
ـ اومال أم أميرة فين نايمين ولا ايه؟
تحدث الدسوقي وهو يتجه الي الداخل قائلاً لها.
ـ انا هدخل اصحيها اهو
ثم فتح باب الغرفة وتحدث الي زوجته وهو يقف علي الباب قائلاً لها.
ـ انتي يا وليه قومي ام جمال هنا
ثم ترك الباب واقترب من ام جمال بعد ان دخلت ووقفت في صالة الشقة، اقترب منها قائلاً لها.
ـ اتفضلي يا ام جمال اقعدي
جلست والدة جمال وهي تنظر حولها بتوتر، لحظات قليلة وخرجت والدة أميرة ويظهر علي وجهها اثار النوم، اقتربت منهم وتحدثت الي والدة جمال بستغراب قائلة لها.
ـ خير يا ام جمال في ايه اللي حصل؟
تحدث اليها زوجها بصرامة قائلاً لها.
ـ روحي اعملي شاي الاول وبعدين نتكلم
تحدثت والدة جمال سريعا قائلة لهم.
ـ لا متشكره خيركم سابق انا بس كنت عايزه اتكلم مع أميرة كلمتين كده بعد اذنكم يعني
نظر اليها الدسوقي بفضول قائلاً لها.
ـ خير كلمتين ايه؟
نظرت اليهم والدة جمال بتوتر قائلة لهم.
ـ يعني يرضيكم يا ابو ضياء ان أميرة تحبس ابو بناتها، هو جمال ده مش كان جوزها وفي بينهم عيش وملح، يعني دي اخرتها الحكومه يجو ياخدوه من علي فرشته نص الليل كده
نظر اليها الدسوقي بصدمة قائلاً لها.
ـ هي أميرة عملت ايه في جمال؟!
نظرت اليه والدة جمال بستغراب.
رواية أميرة أخر الزمان بقلمي ملك إبراهيم
رفعت والدة أميرة حاجبيها بغضب قائلة لـ ام جمال.
ـ عيش وملح ايه اللي انتي جايه تتكلمي فيه يا ام جمال، هو انتوا كنتوا صنتوا العيش والملح ده عشان تيجي تتكلمي دلوقتي كده، دا اللي يسمعك كده ميقولش اللي انتوا عملتوه في بنتي، ميقولش ان ابنك كسر نفسها واتجوز عليها صحبتها، هي كانت أميرة ناقصه ايد ولا رجل عشان يروح يتجوز عليها، ولا كان فيها عيب عشان يرميها عندك في اوضة هي وبناتها ويضربها ويهينها ويطردها في الشارع نص الليل
خفضت والدة جمال وجهها ارضا باحراج فكرت ان تظهر ندمها امام والدة أميرة كي يتعاطفون معها ويضغطوا على أميرة كي تتنازل عن المحضر و تحدثت بهدوء قائلة لوالدة أميرة.
ـ والله يا أم أميرة انا لو لفيت الدنيا دي مش هلاقي ربع بنتك أميرة، بس هقول ايه منها لله مروة هي اللي لعبت على ابني وسحرتله لحد ما اتجوزها ودلوقتي والله مطلعه عينينا وكان وشها علينا وش فقر من يوم ما دخلت علينا واحنا مشوفناش يوم عدل
تابع الدسوقي حديثهم ثم تحدث الي والدة جمال بفضول قائلاً لها.
ـ انا برضه لسه مش فاهم يا ام جمال هي أميرة عملت ايه في جمال ابنك؟
تحدثت والدة جمال بحزن قائلة لهم.
ـ يعني انت يا ابو ضياء متعرفش ان أميرة عملت محضر لجمال ابني في القسم والحكومة جم خدوه من علي سريره..
نظر اليها الدسوقي بصدمة ثم نظر الي زوجته، تابعت والدة جمال نظراتهم الي بعض ثم اضافة والدة جمال بطريقة دراميه قائلة لهم.
ـ انا روحتله القسم دلوقتي ومرضوش يخلوني اشوفه وقالوا عايزين أميرة تروح الصبح تتنازل عن المحضر
تحدثت اليها والدة أميرة بغضب قائلة لها.
ـ وايه اللي يخلي أميرة تروح تتنازل بعد ما ضربها وكسر ضلوعها وشتمنا وهزقنا وفضح بنتي قدام الناس كلها، هي كانت أميرة وحشه ولا كان شاف عليها حاجه عشان يجي يقول الكلآم اللي قاله ده، انا الحمدلله بنتي متربيه احسن تربيه والدنيا كلها بتحلف بأخلاقها
تحدثت والدة جمال بالايجاب قائلة لها.
ـ وانا اشهدلها بأدبها واحترامها، ومتزعليش يا ام أميرة من اللي جمال عمله اصله لسه بيحبها ولسه بيغير عليها ومقدرش يستحمل لما البنات قالوا انها كانت مع راجل تاني
ارتفع صوت والدة أميرة قائلة لها بقوة.
ـ أميرة مكانتش مع حد والراجل التاني اللي بتقولوا عليه ده يبقى الدكتور اللي هيعمل العمليه لجنه وأميرة خدت البنات َراحوله المستشفي عشان يكشف علي جنه ويحدد ميعاد العمليه وكان معاها اخوها ضياء وراندا صحبتها، انا بنتي عمرها ماعملت حاجه غلط وطول عمرها نضيفه لكن الدور والباقي علي ابنك هو اللي فاكر انها زيه
ابتلعت والدة جمال الاهانه بصمت وتحدثت برجاء قائلة لـ ام أميرة.
ـ طب احنا عايزين نحل دلوقتي يا ام أميرة وجمال ابني صحيح غلط بس ده برضه ابو بناتها وميصحش ابو بناتها يتسجن
ثم اضافة بفضول وهي تنظر حولها قائلة لهم.
ـ اومال أميرة فين وانا اتكلم معاها
نظرت والدة أميرة الي زوجها ثم عادت ببصرها قائلة لوالدة جمال ببرود.
ـ منعرفش أميرة فين
ثم اضافة بغضب.
ـ اصل ابو ضياء لما سمع كلام ابنك طردها من هنا
نظرت اليهم والدة جمال بصدمة وتحدثت بزهول قائلة لهم .
ـ اومال راحت فين دلوقتي؟!
تحدث الدسوقي ببرود قائلاً لها.
ـ منعرفش ومنعرفش ايه حكاية المحضر اللي هي عملته ده
تحدثت والدة جمال بزهول قائلة لهم.
ـ اومال مين اللي خلاها تعمل محضر، دا في القسم بيقولوا ان في حد تبعها موصي علي جمال ابني
نظر اليها الدسوقي بستغراب وتحدث الي زوجته بصرامة قائلاً لها.
ـ بنتك فين؟
حركت والدة أميرة رأسها قائلة له.
ـ معرفش وانت كنت شوفتني روحت معاها في حته، انت طردتها وهي مشت ومعرفش راحت فين
وقفت والدة جمال بصدمة قائلة لهم.
ـ يعني ايه ، دا كده ابني هيتسجن ومش هيخرج لو مرحتش الصبح تتنازل
تحدثت اليها والدة أميرة بشماته قائلة لها.
ـ وحتى لو كانت أميرة هنا برضه مكانتش هتتنازل، دا يوم المنى لما ندوخكم كده انتي وابنك في الاقسام وتدوقوا شويه من اللي بنتي داقته علي أيديكم
نظرت اليها والدة جمال بصدمة ثم تحدثت بتحدي قائلة لها.
ـ يبقى انتوا كده بقى اللي عايزين مشاكل وابني هيخرج غصب عنك انتي وبنتك بس ساعتها انا مش هخلي بنتك دي تلمح بس واحده من بناتها وابقي ورينا راجل من عندكم يقفلنا
تحدثت اليها والدة جمال بسخريه قائلة لها.
ـ ربنا اللي هيقفلكم وعمر ما ربنا ينصر ظالم علي مظلوم ابدا... بقلمي ملك إبراهيم.
... يتبع
منتظرة رأيكم وتوقعاتكم في التعليقات مع اجمد تفاعل عشان تشجعوني اكمل❤️🌹🌹
#الحلقة_23
#رواية_أميرة_أخر_الزمان
#بقلمي_ملك_إبراهيم
نظرت اليها والدة جمال بصدمة ثم تحدثت بتحدي قائلة لها.
ـ يبقى انتوا كده بقى اللي عايزين مشاكل وابني هيخرج غصب عنك انتي وبنتك بس ساعتها انا مش هخلي بنتك دي تلمح بس واحده من بناتها وابقي ورينا راجل من عندكم يقفلنا
تحدثت اليها والدة جمال بسخريه قائلة لها.
ـ ربنا اللي هيقفلكم وعمر ما ربنا ينصر ظالم علي مظلوم ابدا
وقفت والدة جمال وخرجت من منزل والدة أميرة واغلقت الباب خلفها بعنف.
وقف الدسوقي ونظر الي زوجته بغضب قائلاً لها.
ـ بنتك راحت فين؟
نظرت اليه والدة أميرة بقلق ثم تحدثت بخوف قائلة له.
ـ راحت عند راندا صحبتها
تحدث اليها بفضول قائلاً لها.
ـ ومين اللي قالها تعمل محضر في جمال، أميرة بنتك متعرفش تعمل كده لوحدها؟!
نظرت اليه والدة أميرة بتفكير، تخشى ان تخبره بأمر الدكتور محمد ومساعدته لابنتها كي لا يفهم زوجها مساعدة الدكتور لابنتها بطريقه خاطئة، توترت قليلا وهي تفكر ماذا تقول له، لاحظ زوجها توترها وتحدث اليها بتحذير قائلاً لها.
ـ شكلك مخبيه عليا حاجه بس خلي بالك لو طلع اللي في دماغي صح يبقى مش هرحمك لا انتي ولا المحروسة بنتك
توترت والدة أميرة اكثر واتجهت الي غرفة النوم بخطوات سريعه كي تهرب من نظرات زوجها اليها.
_________
في منزل والدة جمال..
عادت والدة جمال الي المنزل ونزعت حجابها والقته ارضا بغضب وهي تسب وتلعن في غباء ابنها.
اقتربت منها ابنتها شاهندا تتحدث اليها بفضول قائلة لها.
ـ عملتي ايه يا امي ، اومال جمال فين؟!
تحدثت اليها والدتها بغضب قائلة لها.
ـ لسه في القسم ومش هينفع يخرج غير لو الست أميرة راحت اتنازلت عن المحضر
ثم اضافة بغضب اشد.
ـ اومال اختك وجوزها فين، انتي مكلمتيهمش برضه؟
تحدثت شاهندا وهي تجلس بجوار والدتها بتعب قائلة لها.
ـ انا اتصلت عليهم كتير والاتنين مش بيرضوا شكلهم نايمين
نظرت والدتها حولها قائلة بفضول.
ـ و البنات فين؟
تحدثت شاهندا وهي تشير إلى غرفتها قائلة لوالدتها.
ـ نيمتهم في اوضتي، العيال خايفين اوي ومش فاهمين ايه اللي بيحصل
همست والدتها بغضب قائلة.
ـ خلي الست امهم تتبسط بس وحياة ابني لو متنزلتش بالذوق وابني خد دقيقه احده حبس لاكون حرماها من بناتها وتبقى تيجي تقابلني لو شافت ضفرهم
زفرت شاهندا بتعب قائلة لوالدتها.
ـ طب وبعدين يعني يا امي، هو احنا مش هنخلص من حوارات جمال دي
نظرت اليها والدتها بغضب وتحدثت اليها بصرامة قائلة لها.
ـ كلمتي فريد؟
حركت شاهندا رأسها بالايجاب قائلة لـ والدتها.
ـ ايوه كلمته وقال بكره الصبح هيكون هنا ونروح القسم مع بعض
نظرت والدتها امامها بتفكير ثم تحدثت بشرود قائلة.
ايوا احنا عايزين محامي معانا لان البت شكلها مش ناويه علي خير وشكل كمان في حد بيساعدها
نظرت شاهندا الي والدتها بستغراب قائلة لها.
ـ يعني ايه يا امي مش فاهمه؟!
تحدثت والدتها بثقة قائلة لـ ابنتها.
ـ قالولي في القسم ان في حد تبع أميرة موصي علي جمال وانا بدأت اخاف على ابني اكتر، البت أميرة غلبانه ومكسوره وعمرها كانت تفكر في موضوع المحضر ده لوحدها واكيد في حد وراها وهو اللي مقوي قلبها
نظرت شاهندا الي والدتها بدهشة قائلة لها.
ـ يعني ممكن أميرة تكون تعرف واحد زي ما البنات قالوا؟!
حركت والدتها رأسها بحيرة قائلة لـ ابنتها.
ـ كل حاجه هتبان ويا خبر النهاردة بفلوس بكره هيبقى ببلاش
____________
في الصباح الباكر..
استيقظ الدكتور محمد وارتدا ملابسه للخروج وخرج من غرفته.
نظرت اليه والدته بستغراب قائلة له بقلق.
ـ صباح الخير يا حبيبي، خير ايه اللي مصحيك بدري كده مش عوايدك؟!
تحدث اليها الدكتور محمد بابتسامة قائلاً لها.
ـ صباح الورد يا امي، اطمني مفيش حاجه، انا بس هاخد أميرة للمحكمه عشان تعمل للاستاذ طارق المحامي توكيل
نظرت اليه والدته بصدمة قائلة له.
ـ برضه أميرة يا محمد، مش احنا اتفقنا مندخلش في مشاكلها الخاصه
تحدث الدكتور محمد باعتراض قائلاً لوالدته.
ـ احنا متفقناش علي حاجه يا امي، احنا اتكلمنا وانا محترم كلامك جدا وفي نفس الوقت بعمل معاها اللي بيرضى بيه عليا ضميري، أميرة بنت يتيمه ومسكينه ومحتاجه لليقف جمبها ويساعدها وانا مفيش في نيتي من نحيتها غير كل خير، يبقى ايه اللي يمنع اني اقف جمبها واساعدها!!
تحدثت اليه والدته بهدوء قائلة له.
ـ اللي يمنعك كلام الناس يا محمد ونظرتهم للعلاقة بين اي راجل وست مهما كان مفيش في نيتهم اي حاجه، ومتنساش انها دلوقتي ست مطلقة وانت كمان راجل مطلق يعني محدش هيفهم وقوفك جمبها غير بمعنى مش كويس ليكم انتم الاتنين
زفر محمد بضيق قائلاً لوالدته.
ـ لو سمحتي يا امي انا بعمل خير وشئ مقتنع بيه جدا ومستحيل هتخلي عن واحدة مظلومه عشان كلام الناس، اللي يتكلم يتكلم وربنا شاهد وعالم بنيتي
نظرت اليه والدته بقلة حيلة، أنهى حديثه وذهب من المنزل، وقفت والدته تتأمل الباب بحيرة ثم اتجهت الي الداخل وهي تفكر بخوف وقلق من تطور العلاقة بين ابنها وأميرة.
____________
في شقة فتحي واماني..
استيقظت اماني باكرا، لا تريد ان تنظر الي وجه زوجها بعد ما قاله لها..
قررت ان تترك المنزل وتهدده بطلب الطلاق اذا فكر في الزواج عليها كما قال لها ليلة امس.
اضاءة نور الغرفة كي تضع ملابسها بالحقيبة وتدعي بداخلها ان يستيقظ ويمنعها ويقول لها ان كل ما قاله لها بالامس كان مزحة منه وليس بحقيقة..
رن هاتف فتحي وهو بجواره، اضاءة شاشة الهاتف بصمت، لاحظتها اماني وعلمت ان هاتفه علي وضع الصامت، اقتربت من الهاتف ونظرت اليه تظن انها امرأة أخرى، تفاجأت برقم والدتها..
اخذت الهاتف بقلق وفتحت المكالمه، تحدثت والدتها بسرعة قبل ان تعطي لها فرصة بالحديث قائلة..
ـ ايوه يا فتحي انت فين من امبارح انت واماني عماله اتصل بيكم ومش بتردو؟
رت عليها ابنتها اماني بقلق قائلة لها.
ـ احنا كويسين يا امي، خير كنتي بتتصلي علينا من امبارح ليه؟!
تحدثت والدتها بنواح قائلة لها.
ـ احنا من امبارح في مصيبة يا اماني واخوكي الحكومة جم خدوه من عندنا امبارح بالليل وبايت في القسم من امبارح وانا لوحدي ومش عارفه اتصرف وعماله اتصل عليكي وعلى جوزك مش بتردو
رواية أميرة أخر الزمان بقلمي ملك إبراهيم
شهقت اماني بصدمة ثم تحدثت الي والدتها بصراخ قائلة لها.
ـ وجمال الحكومة جم خدوه ليه يا امي؟!
استيقظ فتحي على صوت زوجته المرتفع وجدها تتحدث بالهاتف، بكت اماني وهي تتحدث الي والدتها قائلة لها.
ـ متقلقيش يا امي احنا هنجيلك دلوقتي ونروح معاكي القسم
نظر اليها زوجها بعدم فهم، اغلقت اماني الهاتف ونظرت اتجاهه وجدته يجلس فوق الفراش ينظر اليها بدهشة ثم تحدث بفضول قائلاً لها.
ـ في ايه، ايه اللي حصل؟، ومين اللي في القسم؟!
تحدثت اليه اماني ببكاء قائلة له.
ـ امي بتقول الحكومة جم خدوا جمال امبارح من البيت، وبتقول ان أميرة هي اللي عملت له محضر
اعتدل فتحي في جلسته عند استماعه الي اسم أميرة وتحدث الي زوجته بفضول قائلاً لها.
ـ وأميرة عملت له محضر ليه؟!
اتجهت اماني الي خزنة الملابس قائلة بقلق.
ـ لسه مش عارفه يا فتحي، امي اتكلمت بسرعه ومفهمتش منها ايه اللي حصل اوي، انا هلبس واروحلها عشان نروح القسم لـ جمال ونعرف ايه الحكايه
فكر فتحي في أميرة وشعر بالفضول لي معرفة ماذا حدث من جمال كي تشتكيه للشرطة.
وقف فتحي من فوق الفراش قائلاً لـ أماني .
ـ طب استني انا هلبس واجي معاكم انا كمان مش هينفع اسيبكم ستات لوحدكم كده.
وقفت اماني تنظر اليه بابتسامة، اسعدها كثيرا ذهابه معها وكانت تعتقد انه ذاهب معها من أجلها هي ومن اجل ان يكون بجوارها ولا تعلم انه ذاهب من اجل أميرة.
__________
في منزل والدة جمال..
وصل فريد باكرا وطرق على الباب بهدوء.
فتحت له خالته وتحدثت اليه بحزن عندما رأته يقف امامها قائلة له.
ـ فريد الحمدلله ان انت جيت، شوفت المصيبة اللي احنا فيها يا فريد، شوفت أميرة قليلة الاصل عملت ايه في جمال ابني
تحدث اليها فريد بهدوء قائلاً لها.
ـ خلينا نقعد ونتكلم يا خالتي واحكيلي جمال عمل ايه بالظبط عشان أميرة تعمل فيه محضر
حركت خالته رأسها بالايجاب ودخلت وجلست وجلس فريد امامها، تنهد فريد بهدوء ثم تحدث الي خالته قائلاً لها.
ـ ايه اللي حصل بقى يا خالتي وجمال عمل ايه لاميرة عشان تروح تعمله محضر
تحدثت خالته بنواح قائلة له.
ـ جمال طلقها زي ما انت عارف ولما راح عشان يطلقها عند المأذون اتفقوا انها هتاخد البنات يوم في الاسبوع تشوفهم، يعني كل يوم جمعه
حرك فريد رأسه بالايجاب لتضيف وخالته قائلة له.
ـ البنات بقى راحوا يوم الجمعه لامهم زي ما اتفقوا ولما البنات جم باليل قالوا علي امهم كلام غريب كده
نظر اليها فريد بفضول، عقد حاجبيه قائلاً لها.
ـ كلام ايه ؟!!
نظرت اليه خالته بتوتر قائلة له.
ـ قالوا يعني انهم شافوا امهم مع راجل وكده
فتح فريد عينيه بصدمة قائلاً لها.
ـ يعني ايه شافوا امهم مع راجل ؟!!
حركت كتفيها قائلة له بمكر.
ـ وانا اعرف يا بني ربنا يسترها علي ولايانا بقى
ازدادت صدمة فريد قائلاً لها.
ـ وبعدين يا خالتي
تحدثت خالته بتوتر قائلة له.
ـ جمال ابن خالتك بقى مستحملش انه يعرف ان بناته شافوا امهم كده ونزل راحلها بيت جوز امها عشان يتكلم معاهم ويعرفها ان مينفعش بناتها يشوفوها في وضع زي ده والبنات مبقوش صغيرين وبقى يفهموا ويعرفوا كل حاجه
تابع فريد توترها ونظرات عينيها التي تتحرك بسرعة وهي تحكي له، حرك رأسه بالايجاب قائلا لها بسخرية.
ـ وطبعا جمال راح كلمهم بكل ذوق وادب وهما اللي قلو ادبهم عليه وراحوا عملوله محضر تعدي كمان صح؟
لم تنتبه خالته انه يتحدث بسخرية وحركت رأسها بالايجاب قائلة له.
ـ عليك نور هو ده اللي حصل بالظبط وانا روحتلهم وش الفجر اترجاهم عشان يتنزلوا وهما مش راضين، دا حتي ملقتش اميرة هناك وميعرفوش هي فين، يعني بنتهم برا البيت لحد الساعه 2 بالليل وكمان ميعرفوش هي فين، شايف قلة الادب
تحدث فريد بغضب مكتوم قائلاً لخالته.
ـ في شهود ان ابنك معملش حاجه وانها بتتبلى عليه ؟
خفضت رأسها بتوتر قائلة له.
ـ معرفش انا في الكلام ده، دا شغلكم انت بقى
تحدث فريد ببرود قائلاً لخالته.
ـ يبقى دلوقتي مفيش حل غير ان اميرة تتنازل وانا شايف انها اتنازلت كتير وصعب تتنازل المرادي كمان
رواية أميرة أخر الزمان بقلمي ملك إبراهيم
نظرت اليه والدته بصدمة قائلة له.
ـ يعني ايه الكلام ده، يعني هتسيب ابن خالتك يتسجن كدا وتقف تتفرج ؟!
تحدث فريد ببرود قائلاً لها.
ـ انا مفيش في ايدي حاجه اعملها يا خالتي والقواضي من النوع ده ملحاش حل غير ان مقدم البلاغ يتنازل وانتي بتقولي انها رافضه تتنازل
تحدثت اليه خالته بصوت مرتفع قائلة له
ـ نخليها تتنازل غصب عنها، دي حتة عيله ملهاش حد وجوز امها راميها يعني نعمل اللي احنا عايزينه ومفيش حد هيقدر يعملنا حاجه
عقد فريد حاجبيه بدهشة قائلاً لها.
ـ نعملها حاجه زي ايه يعني ؟!
تحدثت خالتها بانفعال قائلة له.
ـ نعمل ايه حاجه، نهددها بعيالها، نخوفها، نسوء سمعتها، نعمل فيها اي حاجه المهم ابني ميتسجنش
حرك فريد رأسه بتفهم قائلاً لخالته بسخريه.
ـ قصدك يعني اننا نقول الحكايه اللي انتي حكتيهالي دلوقتي ونزيف الحقيقه ونطلع الظالم مظلوم والمظلوم ظالم صح؟
تفاجأت خالته انه كشف كذبها، حرك فريد رأسه بالايجاب قائلا لها.
ـ متستغربيش يا خالتي، انا عارف ان اللي انتي قولتهولي ده كل مش الحقيقه واي حد هيسمع منك الكلام ده هيعرف انه مش حقيقي
جلست خالته تنظر اليه بصدمة، رن جرس الباب، تركها فريد تجلس بصدمتها ووقف ليفتح الباب، وجد اماني وزوجها فتحي.
__________
امام منزل راندا..
وقف الدكتور محمد بسيارته امام المنزل ينتظر ان يخرج اليه ضياء مع اخته أميرة كي يذهبون الي مجمع المحاكم لعمل توكيل للمحامي تبع الدكتور محمد.
بعد دقايق قليله خرجت أميرة وهي تسند علي كتف اخيها ضياء وسعادتها راندا حتى وصلت الي سيارة الدكتور محمد.
سلمت راندا على الدكتور محمد واعتذرت من أميرة كونها لا تستطيع الذهاب معهم بسبب شغلها، ابتسمت لها أميرة بحب وقبلتها راندا وذهبت في طريقها الي عملها، فتح الدكتور محمد باب السيارة لـ اميرة وساعدها اخيها ضياء في الصعود الي داخل السيارة وجلس هو بالامام بجانب الدكتور محمد.
تحدثت أميرة الي الدكتور محمد باحراج قائلة له.
ـ انا مش عارفه ازاي اشكر حضرتك يا دكتور علي كل اللي عملته وبتعمله معايا
ابتسم الدكتور محمد وهو يقود سيارته ثم نظر اليها بالمرآه الاماميه وتحدث اليها بمرح قائلاً لها.
ـ مفيش شكر ولا حاجه اهم حاجه بس تخفي وتبقي كويسه
نظرت اليه أميرة بالمرآه وخفضت وجهها باحراج.
تحدث ضياء الي اخته وهو يجلس بجوار الدكتور محمد بالامام قائلاً لها.
ـ مش ام جمال جاتلنا البيت امبارح يجي الساعه 2 بالليل كده، شكل الحكومه راحوا خدوه من قفاه
ارتدع قلب أميرة بخوف عندما ذكر اخيها امامها اسم جمال ووالدته، تحدثت اليه بخوف قائلة له.
ـ يعني جمال اتقبض عليه بجد؟!
تحدث الدكتور محمد وهو يقود السياره قائلاً لها.
ـ طبعا اتحبس بجد وبات امبارح في الحبس علي الارض، متقلقيش انا عندي واحد صحبي ظابط ووصيت عليه جامد
رواية أميرة أخر الزمان بقلمي ملك إبراهيم
ابتسمت أميرة بسعاده بعد استماعها الي حديث الدكتور محمد، لاول مرة تشعر ان لها ضهر وسند، هناك أحد يقف بظهرها و يعاقب من اذاها.
تحدث اخيها ضياء بالايجاب قائلاً لها.
ـ ايوه دا شكلهم روقوه هناك لان امه كانت هتتجنن وعايزه تبوس رجلك عشان تتنازلي، انا كنت نايم في الاوضه وصحيت علي صوتها وهي بتتكلم مع ابويا وامي وكان هاين عليها تبوس رجليهم بس امك مسكتتلهاش
تنهدت أميرة بقلق قائلة له.
ـ طب امي وابوك قالولها ايه يعني؟.
تحدث ضياء وهو يبتسم قائلاً لها.
ـ ابويا لحد دلوقتي هيتجنن و مش قادر يصدق ان انتي تعملي كل ده وتحبسي جمال وام جمال هتتجنن اكتر منه
تحدث الدكتور محمد بهدوء قائلاً لهم.
ـ طب هما مش مصدقين ليه، المفروض يعني ان اللي أميرة عملته ده شئ طبيعي واي واحده مكانها كانت هتعمله ويمكن كانت هتعمل اكتر من كده كمان
تحدث ضياء وهو يبتسم قائلاً له.
ـ لا يا دكتور اصل حضرتك متعرفش أميرة اختي
تحدثت أميرة بحزن قائلة له.
ـ لو مكنتش حضرتك يا دكتور محمد انا مكنتش هقدر اعمل اي حاجه، كنت هخاف اني اعمل محضر، احساس اني مليش حد يقف جمبي ده لوحده بيضعف ويخوف اني اقف قصاد حد حتى لو الشخص ده اذاني وكسر ضلوعي كنت هخاف اشتكيه برضه او اتكلم، كنت هسكت وأفضل ماشيه جمب الحيط لاني مش اد المشاكل
نظر اليها بالمرآه الاماميه، تقابلت اعيونهم، شعر برجاء بداخل عيونها تطالبه بان لا يتركها وحدها، ابتسم لها بهدوء وحرك رأسه بالايجاب قائلاً لها بشرود دون ان يشعر.
ـ متقلقيش يا أميرة انا هفضل طول العمر جمبك
تفاجأت أميرة من حديثه، شعر الدكتور محمد بما قاله، تفاجئ هو ايضا من حديثه، اخفض بصره سريعا بعيدا عنها و نظر الي الطريق ثم نظر الي ضياء وجده ينظر امامه بشرود، توتر كثيرا بعد حديثه الاخير اليه، شعرت أميرة بقلبها يخفق بقوة بعد استماعها الي حديث الدكتور محمد لكنها حاولت اقناع نفسها انه حديث عفوي لا يقصد منه اي شئ غير ان يطمنها ويشعرها بالأمان بوجوده بجانبها.
___________
في قسم الشرطة..
وصل فريد ومعه خالته واماني وزوجها فتحي..
دخل فريد وبدأ يتعامل مع رجال الشرطه وطلب منهم ان يرى المحضر ويرى التقرير الطبي..
وقفت والدة جمال وابنتها اماني وفتحي زوج ابنتها جانبا ينتظرون فريد ان يطمنهم بعد ان يرى المحضر.
شهقت اماني بفزع عند رؤيتها لشقيقها يأتي من بعيد مع احد العساكر ويمسك العسكري به، رأت ثياب شقيقها المتسخه والمهرولة عليه وشعره المشعث ووجهه الملطخ.
تحدثت اماني الي والدتها وزوجها قائلة لهم بفزع..
ـ مش اللي جاي علينا ده جمال اخويا ؟!!
نظرت اليه والدتها وشهقت بصدمه و ضربت على صدرها قائلة بفزع.
ـ يا قلب امك يا بني هما عملوا فيه ايه ؟!
ضحك فتحي بسخرية وهو يتأمل جمال وهمس بشماته قائلاً..
ـ دا شكلهم روقوا عليه جوه ... بقلمي ملك إبراهيم.
... يتبع
منتظرة رأيكم وتوقعاتكم في التعليقات مع اجمد تفاعل عشان تشجعوني اكمل❤️🌹🌹
تابع الفصل التالى من هنا (رواية اميرة اخر الزمان الفصل الرابع والعشرون 24)
لقراءة جميع فصول الرواية من هنا (رواية اميرة اخر الزمان كاملة (جميع الفصول) بقلم ملك ابراهيم)
اهلا بك