رواية وتبقى انت الحب الفصل السابع 7
 |
| رواية وتبقى انت الحب الفصل السابع 7 بقلم ملك سعيد |
#البارت_السابع
قراءة ممتعة ❤
_______________
"بس انا مش غريب
عنها انا جوزها يا حمايا العزيز".
جملة نطقها باسل موجه
كلامه لوالد سجي الي بصله
بصدمه وعدم استيعاب هو وأخواته
سجي كانت متابعة الي
بيحصل بقلق وخوف من الي
جاي خايفة من ردة فعل
والدها و اعمامها بعد معرفتهم
بجوازها من باسل
والد سجي بصلها بصدمة
وسألها :"ايه الي قاله ده ؟!
انتي انتي بجد اتجوزتيه؟!".
سجي بصتله بخوف
وبصت في الارض وهي بتفرك
بإيديها بتوتر ومش عارفة ترد عليه بإيه
باسل عينه كانت عليه
ومتابع فركها بإيديها واستشعر
خوفها فقرب من ومد إيده
مسك بإيديها وسجي رفعت
عينيها وبصتله بقلق فقالها
محاولا تهدئتها بنبرة حنونة
هامسة".اهدي ومتخافيش طول
ما انا معاكي مستحيل اسمح
لحد يأذيكي وده وعد مني".
كلامه طمني وهدي من
خوفي و قلقي مش عارفه
ليه بحس معاه بالأمان مع اني
لسه معرفهوش كويس
بس بطريقة كلامه معايا دلوقتي
و الحنية الي ظاهرة في نبرة
صوته بثت الأمان جوايا
والد سجي اتعصب لما شاف باسل
ماسك ايد سجي فقرب منهم
بخطوات سريعة غاضبة لحد
ما وقف قصادهم وحاول يبعد إيد
باسل عن سجي لكن باسل كان قابض
علي ايديها بقوة وإصرار انه
مستحيل يسيبها وكان
بيبص لوالد سجي ببرود
كان محاولات والد سجي فاشلة
في أبعاد إيد باسل عنه إيد سجي
دموع سجي كان سايلة علي
وشها علي الموقف الي هي
فيه هي كانت دايما بتتحامي
في والدها ودلوقتي بتتحامي
في باسل او بالأصح جوزها
باسل شد سجي ووقفها
ورا ضهره وبص لوالد سجي
بهدوء منافي للغضب الي
جواه وقاله:"حضرتك ليه مش
مستوعب كلامي ايه الصعب
فيه قولتلك اني جوز سجي
والأفضل انك تهدي وخلينا
نتكلم بهدوء و بدون مشاكل".
بصله والد سجي بغضب
وقاله بزعيق:"نتكلم في ايه بعد عملتها
السودا للأسف انا كان عندي
أمل اني اكون ظلمتها بعد ما
صدقت رسالة مهاب لكن دلوقتي
اتاكدت ان كلامه صح
والواضح ان مهاب كان
قصده عليك انت انت الي كانت
علي علاقة بيه وهي مخطوبة
لمهاب مش كده؟!".
اتعصب باسل من اتهام والد سجي
ليها الاتهام البشع ده
ازاي فيه اب يقدر يتهم بنته
بالطريقة دي وصل باسل لأقصى
مرحلة الغضب وخاصةً لما
شاف صدمة سجي من كلام أبوها
ودموعها الي سايلة علي وشها
قبض علي إيده بغضب
شكلها الحزين و دموعها خلوه
يحس ان فيه حد قابض
علي قلبه من جوا
بص لأمه الي كانت بتتابع
الي بيحصل بقلق وخوف
وقالها بهدوء منافي لغضبه :"أمي خدي
سجي واطلعوا علي فوق".
امه عرفت ليه باسل
عايزها تطلع سجي لفوق طبعا
مش عايزها تسمع كلام أبوها
واتهاماته ليها
قربت من سجي الي كانت
بتبص لأبوها بخذلان منه
بسبب اتهاماته ليها بالطريقة
البشعة دي
طنط نرمين مدت ايديها
ومسكت إيد سجي الي كانت
باردة برودة التلج من
صدمتها في أبوها
شدت علي ايديها اكتر و
قالتها بحزن علي حالتها:"يلا يا سجي
خلينا نطلع فوق وباسل هيتصرف".
والد سجي اتعصب لما سمع
امر باسل لوالدته انها تاخد سجي
لفوق فمسك ياقة قميص باسل بغضب
شديد وصرخ فيه بقوة
وقاله:"انت مين علشان تبعدها
عن هنا لو انت جوزها فأنا ابوها وزي
ما ليك كلمة عليها
انا كمان ليا".
باسل كان متابعه بهدوء
شديد استفز والد سجي
نرمين قلقت علي ابنها وخافت
عليه وحتي سجي
بس سجي كان جواها مشاعر كتير
متلغبطة خوف علي باسل
من الموقف الي اتحط فيه بسببها
وحزن علي أبوها الي كرهها
بسبب ذنب مرتكبتهوش
سجي قررت أنها تتدخل
ومتقفش مكتوفة الايدين
لازم تواجه اي حد هيشكك
فيها حتي لو كان أبوها
اتحركت بإتجاه باسل و أبوها
مدت ايديها وبعدت أبوها عن
باسل ووقفت بينهم وهي بتبص
لأبوها بقوة مصطنعة عكس
الحزن و الوجع الي جواها
أبوها اتصدم من تصرفها معقول
دي بنته الي رباها وعمره ما
رفضلها طلب واقفة قصاده
علشان الشاب الي كان السبب
في تشويه سمعتها
باسل بص لسجي باستغراب
من تصرفها
هو مكنش عايزها تتدخل علشان
متنجرحش مشاعرها
من مواجهتها لأبوها فمد ايده
ومسك ايد سجي وضغط عليها
بخفة وقالها بلين:"سجي انتي سمعتي
انا قلت ايه اطلعي فوق وانا
هتصرف بلاش توجعي قلبك
اكتر من ما هو موجوع".
سجي التفتت ليه وابتسمتله
بهدوء وقالته وهي بتشيل إيده
الي ماسكاها:"انهاردة لازم أواجه
يا باسل لإني مغلطتش علشان
اخاف واهرب علي فوق لازم
اواجهه علشان كده
متمنعنيش وخليك جنبي".
باسل هز رأسه بإيماءة
بسيطة وقالها بهدوء:"وانا دايما
هكون جنبك".
_"لو كنتوا خلصتوا التمثيليه
الرومانسية دي قدامنا
ياريت تقولولنا من امتي
وانتوا علي علاقة ببعض
ولو كنتوا بتحبوا بعض
للدرجادي ليه وافقتي
تتجوزي مهاب وتشوهي
سمعتنا قدام الكل".
اتهامات واسألة من والد سجي
الي كان مصر علي رأيه ومصدق
رسالة مهاب عن بنته الي رباها علي ايده
سجي الدموع لمعت في
عينيها بسبب كلام والدها
وباسل لما شاف دموعها ضغط
علي ايده بغضب شديد
شوفته لدموعها بتوجع قلبه
بس دلوقتي هو مش هيتدخل
بالعكس هيخليها تواجه بقوة
وبعد كده هيبقي ليه تصرف
تاني مع والدها
وحتي مهاب الي اتسبب
في كل المشاكل دي لسجي
سجي التفتت لوالدها
ومسحت دموعها بقوة وقالته
ببرود مزيف:"معاك حق انا وباسل
كان بينا علاقة واحنا بنحب
بعض جدا ولما مهاب
عرف الحقيقة مقبلش انه
يكمل الجوازة دي وده
من حسن حظي
ها ارتحت".
اتسعت عيون باسل من اعترافها
الكاذب قدام والدها مش المفروض
انها تثبتله براءتها مش
تورط نفسها اكتر
ووالدته بصت لسجي بحزن
علي الموقف الي هي فيه
واضطرارها انها تعترف كذب
علي والدها
صوت صفعة دوي في المكان
بعد ما والد سجي ضربها
بغضب شديد بعد اعترافها
قدامه بعملتها مع انه مينكرش
انه كان مستني منها انها تبررله
بس للأسف اثبتتله ان مهاب
كان معاه حق
سجي حطت ايديها علي
خدها بصدمة ودموعها سالت
علي وشها
باسل مستحملش الي حصل
فمد ايده وجذب سجي لحضنه
وضمها بقوة وهي ما صدقت لقت
حضن دافي يحتويها فبكت بقوة
وصوت شهقاتها انتشر في المكان
وشهقاتها دي حسسته ان في
قبضة قوية بتعصر قلبه
اتحولت عيون باسل من الحزن
والألم عليها
للغضب الشديد وهو بيبص
علي والد سجي الي كان
بيبصلهم بكره وغضب
باسل قاله وهو بيجز علي
أسنانه:"لو كان حد غيرك هو الي
ضربها متتخيلش كنت هعمل
فيه ايه بس للأسف انت ابو
سجي وانا مقدرش
اقلل منك فياريت تاخد
بعضك واخواتك وترجعوا مكان ما جيتوا
وكفاية الي حصل انهاردة
وبالنسبة لسجي فهي مراتي
ومستحيل اسيبها ولو علي موتي
وهحميها دايما حتي لو منك".
انهي كلامه وهو بيزيد
من ضم سجى ليه كإنه بيوعدها
انه دايما هيحتويها طول العمر
وهيحميها بروحه
والد سجى قاله وهو بيجز علي
اسنانه:"متقلقش مني لإني مش
هأذيها ومتفكرش ان ده من حبي
فيها لا بس علشان انا اعتبرتها
ماتت من ساعة ما
عرفت حقيقتها".
خلص كلامه وخد بعضه
وخرج من الفيلا هو وأخواته
اما سجى كانت لسه في حضن باسل
وهو حس بتقل جسمها عليه
فبعدها عن حضنه ووقعت
بين ايديه مغمي عليها
يتبع.......
✧──────✧
رأيكم في البارت
عايزة اعرف رأيكم في التعليقات وحتي توقعاتكم😊
#نوفيلا وتبقي انت الحب
#بقلمي ملك سعيد
دمتم سالمين ❤
تابع الفصل التالى من هنا (رواية وتبقى انت الحب الفصل الثامن 8 بقلم ملك سعيد)
لقراءة جميع فصول الرواية من هنا (رواية وتبقى انت الحب كاملة (جميع الفصول) بقلم ملك سعيد)
اهلا بك